Obren aurkako manifestazioa Durangon
Otsailaren 21ean obrak hasi direla salatzeko manifestazioa egin dugu Durangoko kaleetan. Zapatu goiza izanda jende ugari zebilen kalean erosketak egiten eta beste behin ere AHTri ezetz esateko aprobetxatu dugu. Amaieran testu hau irakurri da:
Honezkero denok jakingo duzuenez, Durangon ere hasi dira AHTren obrak. Pasa den astean, Elkarlanak, herriko hainbat talde eta pertsonarekin batera, prentsaurrekoa eman zuen hori salatzeko, izan ere, Durangoko Udalak oraingoan ere ez du ezer esan, eta guk, herritarrok, eman behar izan dugu horren berri.
Dagoeneko hilabete edo izango da Tabirako igerilekuen ondoan makinak eta zaindariak sartu zituztenetik. Hala ere, Durangoko Udalak eta Aitziber Idigoras alkateak ez digute herritarroi ezer esan. Proiektu osoan bezala, orain ere ezkutuan jokatzen ari dira. Eta ez dugu ulertzen, euren arabera AHT guztiontzat hain ona izango bada zergatik ez diren ausartzen herritar guztion aurrean hori esaten. Ala, beharbada, eurak ere konturatu dira munstro horrek ez digula inolako onurarik ekarriko?
Oraintxe bertan, Durangaldeko 24 enpresatan lan erregulaziorako txostenak onartu dituzte, enpresaren bat edo beste itxi dute edo ixtekotan daude, eta eskualdean 7.000 langabetutik gora ditugu. Eta horren aurrean, zer? Ba milioika euro gastatuko dituzte AHT egiteko; gainera, guk zergen bidez ordaindutako dirua izango da. Hau da, langileak lan barik geratzen dabiltza, eta gobernuak, bitartean, alferreko gastuak egiten langileon diruarekin. Euren komunikabideetan egunero esaten digute krisian gaudela, eta horren aurrean, diru publikoa esku pribatuetara bideratzea besterik ez dute egiten.
Bestalde, obrak hasita dauden arren, Tabirako zatia ez dago guztiz zehaztuta. Oraindik ez dago argi piszinen gainetik joango den zubia ze altueratan pasatuko den, eta Durangoko Udala hori negoziatzen ari da. Beraz, zelan hasi dituzte obrak oraindik obraren beraren ezaugarriak guztiz argi ez badaude? Eurak ere galtzen dira euren joko zikinean…
Obren hasierarekin batera kontrol poliziala ere handitu egin da. Larrinagatxun, Tabira aldean eta Iurretako San Andres auzoan igartzen hasi dira. Gero eta ertzain eta guardia zibil gehiago, zaindari pribatuak alde guztietatik bueltaka, eta kalez jantzitako ertzainak. Beste behin ere argi uzten ari dira herriak nahi ez duena indarrez inposatuko digutela. Baina ez dezatela pentsatu horrela irabaziko dutenik, guk ez dugu etsiko-eta. Badakigu arrazoia daukagula eta aurrera egingo dugu horrekin, arrazoiarekin, eta horrek ematen digun indarrarekin.
Datozen asteetan ere AHTren aurkako protestak antolatu ditugu:
-Datorren zapatuan, hilak 28, mendi martxa egingo dugu kaltetutako lurrak ikusteko. Goizeko 10:00etan hasiko da Andra Mariko elizpean.
-Eta hemendik aurrera, hileko lehen ostegunetan, kontzentrazioa egingo dugu Batzokiaren aurrean. Lehenengoa martxoaren 5ean izango da.
Horretaz gain badago beste deialdiren bat ere, beraz, adi guztiok eta aurrera! Badakigu gelditu daitekeela eta badakigu geldituko dugula!
MILA ARRAZOI DITUGULAKO, AHT GELDITU!
1 Trackback(s)